ಬೆಳಗಾವಿಯಲ್ಲಿ ಇಬ್ಬರು ಕಳ್ಳರ ಬಂಧನ.

 ಬೆಳಗಾವಿ: ಕಳ್ಳತನ ಪ್ರಕರಣದಲ್ಲಿ ₹ 2 ಲಕ್ಷ 22 ಸಾವಿರ ಮೌಲ್ಯದ ಚಿನ್ನಾಭರಣ ವಶಪಡಿಸಿಕೊಂಡು ಇಬ್ಬರು ಕಳ್ಳರನ್ನು ಬಂಧಿಸಲಾಗಿದೆ. ಎಪಿಎಂಸಿ ಪೊಲೀಸರು ಈ ಕ್ರಮ ಕೈಗೊಂಡಿದ್ದಾರೆ. ಬಂಧಿತ ಆರೋಪಿಗಳನ್ನು ವೈಭವನಗರದ ಸತ್ಯಸಾಯಿ ಕಾಲೋನಿಯ ರಂಜಾನ್ ಅಬ್ದುಲ್ ನದಾಫ್ (ವಯಸ್ಸು 19) ಮತ್ತು ಇದ್ರಿಸ್ವಾಲಿ ರಸೂಲಸಾಬ್ ಶೇಖ್ (18 ವರ್ಷ) ಎಂದು ಗುರುತಿಸಲಾಗಿದೆ.

ಕೆಲ ದಿನಗಳ ಹಿಂದೆ ರಮೇಶ್ ರಾಥೋಡ್ ಎಂಬುವರು ತಮ್ಮ ಮನೆಯಲ್ಲಿ ಕಳ್ಳತನವಾಗಿರುವ ಬಗ್ಗೆ ಎಪಿಎಂಸಿ ಪೊಲೀಸರಿಗೆ ದೂರು ನೀಡಿದ್ದರು. ಇನ್ಸ್ ಪೆಕ್ಟರ್ ವಿಶ್ವನಾಥ ಕಬ್ಬೂರಿ ನೇತೃತ್ವದಲ್ಲಿ ಪ್ರಕರಣದ ತನಿಖೆ ನಡೆಯುತ್ತಿದೆ. ಸಬ್ ಇನ್ಸ್ ಪೆಕ್ಟರ್ ಮಂಜುನಾಥ ಬಜಂತ್ರಿ, ಸಬ್ ಇನ್ಸ್ ಪೆಕ್ಟರ್ ತ್ರಿವೇಣಿ ನಾಟೀಕಾರ ಹಾಗೂ ಅವರ ಸಹೋದ್ಯೋಗಿಗಳು ತನಿಖೆ ನಡೆಸಿ ಇಬ್ಬರು ಕಳ್ಳರನ್ನು ಬಂಧಿಸಿದ್ದಾರೆ.