ಬೆಳಗಾವಿ: 2 ಬೋಗಸ್ ವೈದ್ಯರ ಮೇಲೆ ದಾಳಿ.

 

ಬೆಳಗಾವಿ : ಖಾನಾಪುರ ತಾಲೂಕಿನಲ್ಲಿ ಇಬ್ಬರು ಬೋಗಸ್ ವೈದ್ಯರ ಮೇಲೆ ಖಾನಾಪುರ ತಾಲೂಕು ವೈದ್ಯಾಧಿಕಾರಿಗಳು ದಾಳಿ ನಡೆಸಿ ಎರಡು ಕ್ಲಿನಿಕ್ ಗಳನ್ನು ಸೀಲ್ ಮಾಡಿದ್ದಾರೆ. ಖಾನಾಪುರ ತಾಲೂಕಾ ವೈದ್ಯಾಧಿಕಾರಿ ಮಹಾಂತೇಶ ಕಿವಡಸಣ್ಣನವರ ಮಾಹಿತಿ ನೀಡಿ, ತಾಲೂಕಿನಲ್ಲಿ ಅನೇಕ ಬೋಗಸ್ ವೈದ್ಯರು ವೈದ್ಯಕೀಯ ಸೇವೆಯ ದಂಧೆ ನಡೆಸುತ್ತಿದ್ದಾರೆ. ತಾಲೂಕಿನ ಮುಗಳಿಹಾಳ ಹಾಗೂ ಕರ್ತನಬಾಗೇವಾಡಿಯ ಆಸ್ಪತ್ರೆಗಳ ಮೇಲೆ ದಾಳಿ ನಡೆಸಿ ದಾಖಲೆಗಳನ್ನು ಪರಿಶೀಲಿಸಿದಾಗ ಇಬ್ಬರೂ ವೈದ್ಯರ ಬಳಿ ವೈದ್ಯಕೀಯ ಸೇವೆ ನೀಡಲು ಪರವಾನಗಿ ಇರಲಿಲ್ಲ. ಅಲ್ಲದೆ, ವೈದ್ಯಕೀಯ ವಿಭಾಗದ ಯಾವುದೇ ಶಾಖೆಯನ್ನು ಅಧ್ಯಯನ ಮಾಡದಿರುವುದು ಕಂಡುಬಂದಿದ್ದರಿಂದ ಎರಡೂ ಕ್ಲಿನಿಕ್‌ಗಳನ್ನು ಸೀಲ್ ಮಾಡಲಾಗಿದೆ.

ಅಲ್ಲದೆ ಈ ವೈದ್ಯರು ತಮ್ಮ ವೈದ್ಯಕೀಯ ಸೇವಾ ಪ್ರಮಾಣ ಪತ್ರ ಹಾಗೂ ವೈದ್ಯಕೀಯ ಸೇವೆ ನೀಡಲು ಅಗತ್ಯವಿರುವ ಪರವಾನಗಿ ಹಾಗೂ ಇತರೆ ದಾಖಲೆಗಳೊಂದಿಗೆ ಏಳು ದಿನಗಳೊಳಗೆ ತಾಲೂಕಾ ವೈದ್ಯಾಧಿಕಾರಿಗಳ ಕಚೇರಿಗೆ ಹಾಜರಾಗುವಂತೆ ನೋಟಿಸ್ ನೀಡಲಾಗಿದೆ. ಈ ಕ್ರಮದಿಂದ ಖಾನಾಪುರ ತಾಲೂಕಿನಲ್ಲಿ ಸಂಚಲನ ಮೂಡಿದೆ.

ಇಡೀ ತಾಲ್ಲೂಕಿನಲ್ಲಿ ಪರವಾನಗಿ ಇಲ್ಲದ ಅನೇಕ ಬೋಗಸ್ ವೈದ್ಯರು ಅಭ್ಯಾಸ ಮಾಡುತ್ತಿದ್ದಾರೆ. ಇದು ಅನೇಕ ಜೀವಗಳನ್ನು ಬಲಿ ತೆಗೆದುಕೊಂಡಿದೆ. ಇದಕ್ಕಾಗಿ ತಾಲೂಕಿನಲ್ಲಿ ಬೋಗಸ್ ವೈದ್ಯರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಹೇಳಿದರು. ಅಲ್ಲದೇ ತಾಲೂಕಿನಲ್ಲಿ ಎಲ್ಲೆಂದರಲ್ಲಿ ಬೋಗಸ್ ಕ್ಲಿನಿಕ್ ನಡೆಸುತ್ತಿರುವ ಬಗ್ಗೆ ಮಾಹಿತಿ ನೀಡಿದರೆ ಆ ವೈದ್ಯರ ವಿರುದ್ಧ ಖಚಿತ ಕ್ರಮ ಕೈಗೊಳ್ಳಲಾಗುವುದು ಎಂದು ತಾಲೂಕು ವೈದ್ಯಾಧಿಕಾರಿಗಳು ತಿಳಿಸಿದ್ದಾರೆ.