ವಡಗಾವಿ ಮಂಗೈಯಾತ್ರೆಯಲ್ಲಿ ಪ್ರಾಣಿಬಲಿ ತಡೆಯಿರಿ.

 

ಬೆಳಗಾವಿಯ ಶ್ರೀ ಮಂಗೈದೇವಿ ಯಾತ್ರೆ ವೇಳೆ ನಡೆಯುವ ಪ್ರಾಣಿ ಬಲಿ ತಡೆಗಟ್ಟಲು ಜಿಲ್ಲಾಡಳಿತ ಅಗತ್ಯ ಕ್ರಮಕೈಗೊಳ್ಳಬೇಕು ಎಂದು ವಿಶ್ವಪ್ರಾಣಿ ಕಲ್ಯಾಣ ಮಂಡಲ ಹಾಗೂ ಪ್ರಾಣಿ ಬಲಿ ನಿವಾರಣೆ ಮಹಾಮಂಡಳದ ಶ್ರೀ ದಯಾನಂದ ಸ್ವಾಮೀಜಿ ಆಗ್ರಹಿಸಿದ್ದಾರೆ.

ಈ ಕುರಿತು ಪೊಲೀಸ್ ಆಯುಕ್ತ ಯಡಾ ಮಾರ್ಟಿನ್ ಮಾರ್ಬನ್ಯಾಂಗ್ ಅವರಿಗೆ ಸ್ವಾಮೀಜಿ ಹೇಳಿಕೆ ನೀಡಿದ್ದಾರೆ. ಜುಲೈ 29, 30 ಮತ್ತು 31 ರಂದು ದೇವಿಯ ಯಾತ್ರೆ ನಡೆಯಲಿದೆ. ಈ ಅವಧಿಯಲ್ಲಿ ದೇಗುಲದ ಆವರಣದಲ್ಲಿ ಅಥವಾ ದೇವಸ್ಥಾನದ ಸುತ್ತಮುತ್ತ ಯಾವುದೇ ರೀತಿಯ ಪ್ರಾಣಿಗಳ ಹತ್ಯೆ ಮಾಡಬಾರದು ಎಂದು ಸ್ವಾಮೀಜಿ ಒತ್ತಾಯಿಸಿದ್ದಾರೆ.

ದೇವಾನುದೇವತೆಗಳ ಹೆಸರಿನಲ್ಲಿ ಪ್ರಾಣಿಗಳನ್ನು ಕೊಲ್ಲುವುದು ಒಂದು ರೀತಿಯ ಮೂಢನಂಬಿಕೆ. ಈ ಪ್ರಕಾರವು ಪರಿಸರಕ್ಕೆ ಹಾನಿಕಾರಕವಾಗಿದೆ ಮತ್ತು ಧರ್ಮಕ್ಕೆ ವಿರುದ್ಧವಾಗಿದೆ. ಆದುದರಿಂದ ದೇವಿಯನ್ನು ಅಹಿಂಸಾತ್ಮಕವಾಗಿ, ಸಾತ್ವಿಕವಾಗಿ ಪೂಜಿಸುವಂತೆ ಭಕ್ತರಲ್ಲಿ ವಿನಂತಿಸುತ್ತಾ, ದೇವಾಲಯಗಳು ಕಸಾಯಿಖಾನೆಗಳಾಗದೆ, ದೈವಾಲಯಗಳಾಗಬೇಕು. ಪ್ರಾಣಿ ಹತ್ಯೆ ಮತ್ತು ಮಾದಕ ವಸ್ತುಗಳಿಂದ ಮುಕ್ತರಾಗಬೇಕು. ನಿರ್ಣಯದಲ್ಲಿ ಭಕ್ತಿ, ಸೌಮ್ಯ ಮತ್ತು ಪುಣ್ಯದ ತ್ರಿವೇಣಿ ಸಂಗಮಕ್ಕೂ ಸ್ವಾಮೀಜಿ ಕರೆ ನೀಡಿದ್ದು, ಹೈಕೋರ್ಟ್ ಆದೇಶದ ಪ್ರತಿಯನ್ನು ಪೊಲೀಸ್ ಆಯುಕ್ತರಿಗೆ ಹಸ್ತಾಂತರಿಸಿದ್ದಾರೆ.