ಬೆಳಗಾವಿ: ಯಲ್ಲಮ್ಮ ದೇವಿ ದೇವಸ್ಥಾನದ ಹೈಟೆಕ್ ಅಭಿವೃದ್ಧಿಗೆ ₹ 200 ಕೋಟಿ.

 

ಬೆಳಗಾವಿ : ಸೌಂದತ್ತಿಯ ರೇಣುಕಾ ಯಲ್ಲಮ್ಮ ದೇವಿ ದೇವಸ್ಥಾನದ ಹೈಟೆಕ್ ಅಭಿವೃದ್ಧಿಗೆ ₹ 200 ಕೋಟಿ ಯೋಜನೆ.  ಮುಂಗಾರು ಅಧಿವೇಶನ ಮುಗಿದ ಕೂಡಲೇ ಈ ಯೋಜನೆಗೆ ಉತ್ತೇಜನ ನೀಡಲಾಗುವುದು ಎಂದು ಸಚಿವ ಸತೀಶ್ ಜಾರಕಿಹೊಳಿ ಹೇಳಿದ್ದಾರೆ.  ಬುಧವಾರ ದೇವಸ್ಥಾನಕ್ಕೆ ಭೇಟಿ ನೀಡಿದ ಬಳಿಕ ಸುದ್ದಿಗಾರರೊಂದಿಗೆ ಅವರು ಮಾತನಾಡಿದರು.

ಯಲ್ಲಮ್ಮ ದೇಗುಲದಲ್ಲಿ ಭಕ್ತರಿಗೆ ಎಲ್ಲ ರೀತಿಯ ಸೌಲಭ್ಯ ಕಲ್ಪಿಸುವ ಜತೆಗೆ ದೇವಸ್ಥಾನದ ವ್ಯಾಪ್ತಿಯ ಸ್ವಚ್ಛತೆ ದೃಷ್ಟಿಯಿಂದ ವಿಶೇಷ ಅಭಿವೃದ್ಧಿಯಾಗಲಿದೆ ಎಂದರು. ಪ್ರವಾಸೋದ್ಯಮ ಇಲಾಖೆ ಸಚಿವ ಎಚ್. ಕೆ. ಪಾಟೀಲ ಅವರು ದೇವಸ್ಥಾನದ ಅಭಿವೃದ್ಧಿಗೆ ವಿಶೇಷ ಕಾಳಜಿ ವಹಿಸಿದ್ದು, ಭವಿಷ್ಯದಲ್ಲಿ ಯಲ್ಲಮ್ಮ ದೇವಸ್ಥಾನ ಆದರ್ಶ ದೇವಸ್ಥಾನವಾಗಿ ಹೊರಹೊಮ್ಮಲಿದೆ ಎಂದರು.

ಮಾಜಿ ಮುಖ್ಯಮಂತ್ರಿ ದೇವೇಗೌಡರ ಕಾಲದಲ್ಲಿ ಸೌಂದತ್ತಿವರೆಗೆ ರೈಲು ಮಾರ್ಗ ಆರಂಭಿಸಲು ಸಮೀಕ್ಷೆಗೆ ಮಾತ್ರ ಸೂಚಿಸಲಾಗಿತ್ತು; ಆದರೆ ಈ ಭಾಗದಲ್ಲಿ ರೈಲ್ವೆಗೆ ಅನುಮತಿ ಸಿಕ್ಕಿಲ್ಲ. ರಾಜ್ಯದ ಹಲವು ರೈಲ್ವೆ ಯೋಜನೆಗಳು ಭಾಗಶಃ ಸ್ಥಿತಿಯಲ್ಲಿದ್ದು, ಅವು ಪೂರ್ಣಗೊಂಡ ನಂತರ ಸೌಂದತ್ತಿ ರೈಲ್ವೆ ಯೋಜನೆಗೆ ಹೆಚ್ಚಿನ ಗಮನ ನೀಡಲಾಗುವುದು ಎಂದು ಸಚಿವ ಜಾರಕಿಹೊಳಿ ವಿವರಿಸಿದರು. ಈ ಸಂದರ್ಭದಲ್ಲಿ ವಕೀಲರ ಸಂಘದ ವತಿಯಿಂದ ಸನ್ಮಾನಿಸಲಾಯಿತು.